ПРОБЛЕМ СО ПАТУВАЊЕТО – Ирак бара одложување на клучниот меч за Светското првенство

Селекторот на ирачката фудбалска репрезентација, Греам Арнолд, побара одложување на баражот за пласман на Светското првенство што неговиот тим треба да го одигра овој месец, поради сериозните проблеми со патувањата предизвикани од војната на Блискиот Исток.

Ирачката федерација стравува дека нема да може да ги донесе сите најдобри фудбалери и членови на стручниот штаб во Мексико за натпреварот закажан на 31 март во Монтереј, каде Ирак треба да се соочи со победникот од дуелот меѓу Боливија и Суринам.

Половина од играчите на првиот тим се наоѓаат во Ирак, додека селекторот Арнолд моментално престојува во Дубаи. Според него, доколку тимот биде составен само од играчи кои живеат надвор од Ирак, шансите за пласман на Светското првенство значително ќе се намалат.

„Тоа нема да биде нашиот најсилен состав, а за најважниот натпревар на земјата во последните 40 години ни е потребен најдобриот можен тим“, изјави Арнолд за Асошиејтед Прес.

Дополнителен проблем претставува фактот што ирачкиот воздушен простор е затворен откако САД и Израел започнаа воздушни напади врз Иран на 28 февруари, што сериозно го наруши воздушниот сообраќај во регионот.