ТАНЕЦ ЈА ОТВОРА СЕЗОНАТА 2026 – Пулсот на предците, во ритамот на денешницата
Нова концертна сезона со современ ритам и традиционален дух
Националниот ансамбл за народни игри и песни „Танец“ ја отвора новата концертна сезона под мотото „Пулсот на предците, во ритамот на денешницата“
Во оваа сезона, „Танец“ продолжува да ја раскажува живата историја на македонскиот фолклор, со храбар чекор кон современите сценски изрази, без да ја изгуби изворната чистота на македонскиот културен код. Публиката може да очекува незаборавно доживување каде минатото и сегашноста се преплетуваат преку прецизна играорна техника, раскошен вокал и неповторливите звуци на традиционалните инструменти.
Главни проекти во сезоната 20026 се:
1. „Чалгиски бисери“. Овој проект е посветен на зачувување и ревитализација на македонската чалгиска традиција како нематеријално културно наследство. Фокусот е на автентични чалгиски состави и градски песни кои со векови се пееле низ македонските чаршии. Публиката ќе ужива во подзаборавени мелодии, преработени со современи аранжмани, изведени од врвните инструменталисти на оркестарот на „Танец“ и од вокалните солисти и хор. Целта е да се прикаже софистицираноста на македонската градска култура и нејзината поврзаност со ориенталниот дух.
2. „Вечното ехо на Бадев“
Овој проект е емотивно навраќање кон ликот и делото на легендарниот Никола Бадев, еден од највпечатливите машки вокали во македонската народна музика. Фокусот е на карактеристичниот интерпретаторски стил на Бадев, преточен во современи оркестарски аранжмани. Проектот е инспириран од соработката со неговата ќерка, Роска Бадева, која активно работи на зачувување на неговото музичко наследство. Целта е оддавање почит на доајенот кој постави стандарди за изведба на македонската лирска и епска песна.
Покрај овие проекти, програмата за 2026 година ќе вклучува и премиерни изведби на нови музичко-сценски дела кои ја истражуваат „ритмичката пулсација“ на современата музика преку иновативни аранжмани.
Сезоната започнува со традиционалниот Велигденски концерт на 8 април 2026 година во Македонскиот народен театар. По отворањето, „Танец“ ќе продолжи со турнеја низ градовите во Македонија.
Како вистински подвижен музеј на македонското духовно богатство, ансамблот оваа година ќе настапува и на светските сцени, носејќи го македонскиот мелос и оро во Обединетото Кралство и Република Малта, со цел да ги зачува и презентира богатствата на нашата култура на глобалната публика.
