ИЛИ СО НАС, ИЛИ СО РУСИЈА – Лавров повторно ја критикува западната стратегија
Лавров открива дека Русија прифатила значајни предлози од САД, но пријателската атмосфера од самитот исчезнува.
Рускиот министер за надворешни работи, Сергеј Лавров, изјави дека договорот постигнат на самитот Русија-САД во Анкориџ подразбира значајни компромиси од руска страна, но додаде дека „духот на Анкориџ испарува“.
Во обраќањето на амбасадорската тркалезна маса за решавање на конфликтот во Украина, Лавров се осврна на разбирањето што го постигнаа американскиот претседател Доналд Трамп и рускиот лидер Владимир Путин за време на средбата во Алјаска во август 2025 година:
„Рускиот претседател Владимир Путин неколку пати изјави дека ги прифативме предлозите на американската страна, вклучувајќи и оние што веќе претставуваат значаен компромис за нас“, рече Лавров, пренесува Спутник.
Тој оцени дека атмосферата на руско-американските преговори била позитивна, но дека пријателскиот „дух“ што ја одликуваше средбата полека исчезнува. Според Лавров, духот означуваше меѓусебно почитување и конструктивност, што сега веќе не е присутно.
Министерот истакна дека Москва јасно забележува обиди од Украина и Европа за „ревидирање на разбирањето“ од состанокот во Анкориџ, но дека Русија останува посветена на постигнување решение во Украина и се надева дека САД ќе продолжат по истиот курс.
Лавров нагласи дека пристапот на Западот „или со нас, или со Русија“ останува актуелен и дека се манифестира особено преку обидите Украина да се приклучи во НАТО, и покрај предупредувањата од Путин уште од Минхенскиот говор во 2007 година.
„Никој не знае што ќе им се допадне на САД утре. Последниве години, им пречеше фактот што Украина е сосед на Русија, која се обидуваше да изгради нормални односи. САД ја привлекоа кон Европската Унија со слоганот ‘или со нас, или со Русија’. Тој принцип не исчезна и нема да исчезне“, рече Лавров.
Тој додаде дека Западот не води хибридна, туку директна „жешка“ војна против Русија, со цел да ја ослаби и да ѝ нанесе стратешки пораз. Лавров исто така рече дека Русија никогаш не ги видела безбедносните гаранции на Западот за кои зборува украинскиот претседател Володимир Зеленски.
