КОЛЕКТИВНАТА ОДБРАНА НА МАСА – НАТО не ја исклучува активацијата на член 5 против Иран
Алијансата предупредува дека ќе одговори доколку нејзината територија биде загрозена
Генералниот секретар на НАТО, Марк Руте, изјави во интервју за Newsmax дека алијансата би можела да ја активира клаузулата за колективна одбрана Член 5 доколку дојде до директна закана од Иран.
„Подготвени сме за вакво сценарио. НАТО во моментов презема мерки за целосна заштита на секој сантиметар од територијата на алијансата“, нагласи Руте, одговарајќи на прашање за можната активација на Член 5.
Тој истакна дека НАТО намерно останува воздржан и двосмислен околу конкретните услови под кои би се активирала клаузулата за колективна одбрана.
„Тоа е направено со цел да не им се даде стратешка предност на потенцијалните противници“, објасни Руте.
Тој додава дека доколку Член 5 биде активиран, алијансата тоа јавно и веднаш ќе го соопшти.
Руте појасни дека НАТО директно не учествува во воените операции против Техеран, но нагласи дека голем дел од сојузниците ги поддржуваат акциите на Соединетите Американски Држави, насочени кон уништување на ракетните и нуклеарните капацитети на Иран. Според него, земјите-членки обезбедуваат логистичка и стратешка поддршка за американските активности во регионот.
И покрај критиките од одредени европски лидери, меѓу кои Емануел Макрон и Педро Санчез, Руте истакна дека НАТО-сојузниците сепак даваат „клучна помош“ за американско-израелската кампања.
На крајот, генералниот секретар потенцираше дека силите на алијансата остануваат во целосна борбена готовност и се подготвени да ја бранат територијата на НАТО, додека тензиите на Блискиот Исток продолжуваат да растат.
