ЗА ДЕНОТ НА ЖЕНАТА – Македонската филхармонија со спектакуларен концерт

Во четврток, со почеток во 20 часот, Македонската филхармонија ќе одржи концерт посветен на Денот на жената, насловен „Сила“. Концертот ќе го води диригентката Ребека Тонг од Индонезија, а како солист ќе настапи пијанистот Ендру фон Ојен од Франција.

На програмата се „Павана“, опус 50 од Габриел Форе, Концертот за пијано и оркестар бр. 2 во ге-мол од Камиј Сен-Санс и симфониската скица „Море“ од Клод Дебиси.

Ребека Тонг е резидентен диригент на Симфонискиот оркестар и уметнички директор на Ансамблот за современа музика во Џакарта. Во 2020 година освои Прва награда на „La Maestra“ во Париз и „ARTE Prize“. Таа има настапувано со престижни оркестри како Симфонискиот оркестар на Барселона, Германскиот симфониски оркестар во Берлин, Оркестарот на Париз, Националниот оркестар на Франција, Филхармонијата и Симфонискиот оркестар на Лондон, Камерниот оркестар на Париз, Националниот оркестар на Монпелие и Би-би-си Филхармонијата.

Во својата кариера била асистентка на Мајкл Тилсон Томас и Франсоа Гзавие-Рот, а учествувала на мастер-часови со мајстори како Туган Сокијев, Пабло Ерас-Касадо и Марин Алсоп. Добитничка е на Taki Award 2019, како и на неколку диригентски стипендии, вклучувајќи David Effron Conducting Fellowship и Cabrillo Festival of Contemporary Music Fellowship. Активно ја обликува програмата на Симфонискиот оркестар на Џакарта, со цел да ја запознае публиката со класични и современи дела. Основач е на Младинскиот христијански оркестар на Џакарта (2011). Родена е во музичко семејство, со кинеско потекло, и уште од млада возраст посветено ја следи музиката како моќно средство за поврзување на заедниците.

Ендру фон Ојен е меѓународно признат пијанист, познат по извонредната техника и елегантната интерпретација. Дебитирал со Филхармонијата на Лос Анџелес на 16 години, а од тогаш настапувал како солист со водечки оркестри, вклучувајќи го Филаделфија оркестарот, Симфонискиот оркестар на Лос Анџелес, Берлинскиот симфониски оркестар, Прашката филхармонија, Маринскиот оркестар, Би-би-си симфонискиот оркестар, Симфонискиот оркестар на Токио и Симфонискиот оркестар на Сингапур.

Настапувал во врвни концертни сали како Вигмор Хол и Барбикан во Лондон, Линколн Центар во Њујорк, Кенеди Центар во Вашингтон, Симфониската сала во Бостон, Театарот Тони Хол во Лос Анџелес, Театарот Хербст во Сан Франциско, Тонхале во Цирих, Ројал Опера во Версај и Театро Олимпико во Рим.

Фон Ојен има издадено албуми за Warner Classics, вклучувајќи „Bach-Beethoven“ (2021) и „Angels & Demons“ (2024), кои достигнале високи позиции на стриминг платформите. Роден во САД, со германско и холандско потекло, започнал да учи пијано на пет години, а на десет дебитирал со оркестар. Дипломирал на Колумбија Универзитет и на Џулијард школата, каде што негови наставници биле Херберт Стесин и Џером Ловентал, а работел и со Алфред Брендел и Леон Флајшер. Добитник е на Gilmore Young Artist Award (1999) и на Првата награда на Léni Fé Bland Foundation National Piano Competition (2001). Денес живее во Лос Анџелес и Париз, поседувајќи американско и француско државјанство.