РЕКОРДНА ГОДИНА ЗА НОРВЕШКИ ФОНД – Профит од 248 милијарди долари во 2025 година

Норвешкиот државен инвестициски фонд минатата година забележа извонреден резултат, остварувајќи профит од 248 милијарди долари и принос од 15,1 отсто, поттикнат од силниот раст на глобалните берзи.

До крајот на 2025 година, вредноста на најголемиот светски суверен фонд достигна околу 2.200 милијарди долари, што претставува значително зголемување во однос на приближно 2.080 милијарди долари една година претходно.

Најголем придонес за позитивниот резултат имале инвестициите во акции, особено во технолошкиот сектор и финансиските компании. Американските технолошки гиганти се издвоиле како клучен двигател на приносот, благодарение на нивниот силен пазарен раст.

Покрај акциите, фондот вложува средства и во обврзници, недвижности и инфраструктурни проекти поврзани со обновливи извори на енергија, со цел диверзификација и долгорочна стабилност.

Со имот вреден повеќе од два трилиони долари, фондот го управува Norges Bank Investment Management, кој ги инвестира вишоците приходи од нафта и гас во име на норвешките граѓани. Основан во 1990-тите години, фондот денес поседува удели во над 7.200 компании во околу 60 земји и контролира приближно 1,5 отсто од сите котирани акции на глобално ниво.