КОЛАПС ВО ЈАВНИОТ ПРЕВОЗ – Германија денеска во штрајк

Германија денеска е зафатена од масовен 24-часовен штрајк во јавниот превоз, откако синдикатот Verdi повика на прекин на работата во комуналните претпријатија за локален транспорт.

Патниците кои користат автобуси, трамваи и метро треба да се подготват за сериозни доцнења и целосни откажувања на линиите во бројни германски градови. Во дел од погодените средини, сообраќајот може целосно да биде во прекин, јавуваат германските медиуми.

Штрајкот е дел од тековните национални колективни преговори и опфаќа околу 150 транспортни претпријатија. Тој се спроведува во сите сојузни покраини, освен во Долна Саксонија, каде што сè уште важи обврската за таканаречен „социјален мир“, која законски го исклучува правото на штрајк.

Синдикатот Verdi преговара во име на речиси 100.000 вработени во локалниот јавен превоз и бара подобри услови за работа, пократка работна недела, подобар сменски распоред, подолги периоди за одмор, како и повисоки додатоци за ноќна и викенд работа. Во одделни покраини, меѓу кои Баварија, Бранденбург, Сарланд и Тирингија, дополнително се бара и зголемување на платите.

Германската железница Deutsche Bahn соопшти дека железничкиот сообраќај ќе се одвива без ограничувања. Штрајкот не ги опфаќа S-Bahn линиите во Берлин, Хамбург, Минхен, Штутгарт, Келн, Нирнберг и регионот Рајн-Мајн и регионалниот и меѓуградскиот железнички сообраќај.

Возачите се советуваат да планираат повеќе време за патување и, доколку е можно, да користат алтернативни рути, бидејќи се очекуваат сообраќајни застои, особено за време на утринските и попладневните шпиц-термини. Како алтернатива на јавниот превоз се препорачува користење изнајмени автомобили, велосипеди и електрични тротинети.

Паралелно со штрајкот во јавниот превоз, синдикатот Verdi најави и предупредувачки штрајк на вработените во службите за одржување на патиштата во југоисточниот дел на Долна Саксонија. Засегнати се регионите Волфенбител, Гослар и Гандерсхајм, каде што се очекуваат ограничувања во зимското одржување и повремени затворања на тунели. Овој штрајк ќе трае од 2 до 4 февруари.