ВОДЕН БРАН ПУСТОШЕШЕ НИЗ КОСТУРИНО – Водата однесе 120 јагниња и 100 овци, сточарите спасуваа живи глави

Поради обилните врнежи од дожд што го зафатија Струмичко, надојдената вода од Тркањска Река вчера попладне однесе 120 јагниња и околу 100 овци од шталата на сточарот Никола Колев во селото Костурино. Силниот воден бран носел сè пред себе, а целиот настан се одвивал за помалку од десет минути.

„Водата нагло надојде и достигна висина од над два метри. Немавме време да ја отвориме шталата и да ги спасиме животните. Штетата е огромна. Во еден момент постоеше реална опасност и нас да нè однесе водата, мене и брат ми Никола, но за среќа успеавме да се извлечеме“, изјави Зоран Колев, брат на сопственикот.

Штетата е пријавена во Општина Струмица, како и кај надлежните институции, кои треба да излезат на терен и да извршат проценка на загубите.

Покрај Костурино, обилните дождови предизвикаа поплави и на земјоделски површини и дворови во селата Муртино и Сачево. Градоначалникот Петар Јанков информира дека ги посетил критичните точки во Муртино и околината и дека екипи на ЈП „Комуналец“, со соодветна механизација, се постојано на терен.

„Циклонот што го зафати југоисточниот регион донесе интензивни врнежи, што резултираше со надоаѓање на реките, излевање од коритата и поплави. Нашите екипи остануваат ангажирани на сите критични локации. Дождови се најавени и во наредните денови, па состојбата внимателно ќе се следи“, изјави Јанков.

Според податоците на Управата за хидрометеоролошки работи, во Струмица досега наврнале околу 20 литри дожд на квадратен метар.