ТРЕТО ПОЛУВРЕМЕ – Реал одби да им оддаде почит на Барселона

Финалето на Шпанскиот Суперкуп, играно во Џеда, донесе спектакуларен натпревар во кој Барселона го победи Реал Мадрид со 3:2, отворајќи ја 2026 година на најдобар можен начин.

Реал успеа двапати да возврати, но со голот на Рафиња, Барселона ја обезбеди победата и ја продолжи својата доминација во дуелите со големиот ривал. Натпреварот беше возбудлив и одличен за неутралната публика, а впечатокот е дека Барселона заслужено славеше, иако Реал имаше две одлични шанси на крајот и можеше да добие и пенал.

Сепак, по мечот се случи нешто необично – Реал одби да им оддаде почит на играчите на Барселона. Традиционално, тимот што не освоил трофеј стои настрана и аплаудира на победниците како знак на спортска почит. Барселона претходно го практикуваше овој обичај кон Реал. Поради тоа, однесувањето на фудбалерите на Реал беше сметано за непочитувачко и несоодветно.

Според новинарот Алфредо Мартинез, клучната улога ја имал Килијан Мбапе, кој ги повел своите соиграчи подалеку од местото каде што требало да се оддаде почит на ривалот.

Иако претседателот Флорентино Перез сепак морал да го поздрави тимот на Барселона и да им честита за победата, Мбапе и неговите соиграчи одбиле да им честитаат на ривалите.