СОПСТВЕНИКОТ НА БАРОТ ВО КРАНС-МОНТАНА Вратата за итни случаи била заклучена за време на пожарот
Првичните наоди покажуваат дека пожарот почнал од контакт на прскалките со акустичната пена на таванот
Сопственикот на барот „Констелејшн“ во Кранс-Монтана, Швајцарија, каде што за време на новогодишната забава во пожар загинаа 40 лица, им изјавил на истражителите дека вратата за итни случаи била заклучена одвнатре во моментот на трагедијата.
Жак Морети, француски државјанин и ко-сопственик на локалот, беше приведен во петокот, додека обвинителството во кантонот Вале ја продолжува истрагата. Заедно со сопругата Џесика Морети, тој е осомничен за убиство од небрежност, телесни повреди од небрежност и предизвикување пожар од небрежност.
Според извадоци од полициски извештаи, објавени во неколку француски и швајцарски медиуми, Морети изјавил дека за заклучената врата дознал кратко време по избувнувањето на пожарот. Кога пристигнал на местото на настанот, насилно ја отворил вратата и зад неа пронашол неколку лица како лежат, потврдил извор близок до истрагата за АФП.
Како што пренесува „Франс 24“, првичните наоди укажуваат дека пожарот бил предизвикан од контакт на прскалки со акустичната пена поставена на таванот во подрумот на објектот. Морети изјавил дека пената ја купил во продавница за „направи сам“ и сам ја поставил за време на реновирањето на барот, откако го купил во 2015 година.
Тој тврди дека спровел сопствени тестови и дека свеќите со прскалки, кои редовно се користеле при послужување шишиња вино, не биле доволно силни за да ја запалат изолационата пена.
„Секогаш користиме ваква свеќа кога служиме шише вино во трпезаријата“, изјавила Џесика Морети, која по сослушувањето во петокот беше пуштена на слобода.
Истрагата, исто така, ги разгледува и прашањата за бројот и исправноста на противпожарните апарати, како и дали излезите од барот биле во согласност со безбедносните прописи.
Во врска со присуството на малолетници во барот во моментот на пожарот, Морети изјавил дека влезот бил забранет за лица под 16 години, додека на оние меѓу 16 и 18 години им било дозволено да влезат само во придружба на возрасно лице. Тој навел дека ваквите правила му биле јасно наложени на обезбедувањето, но признал дека „можно е да имало пропуст во спроведувањето на протоколот“.
Истрагата за една од најтешките трагедии во Швајцарија во последните години сè уште е во тек.
