ЛАВРОВ: „НАШИТЕ ТЕСТОВИ НЕ ГИ КРШАТ МЕЃУНАРОДНИТЕ ДОГОВОРИ“ Трамп покажува погрешно разбирање на природата на тестовите

Рускиот министер за надворешни работи Сергеј Лавров изјави дека Москва не спровела нуклеарни тестови, отфрлајќи ги тврдењата на американскиот претседател Доналд Трамп. Тој нагласи дека тестовите на руските системи „Буревестник“ и „Посејдон“ не го кршат Договорот за сеопфатна забрана на нуклеарни тестови, бидејќи користат нуклеарен погон, но не предизвикуваат детонации.

Лавров ги нарече неточни извештаите за спор со американскиот државен секретар Марко Рубио и изрази загриженост поради изјавите на Роберт Кадлек за можна употреба на нуклеарно оружје во регионални конфликти.

Во однос на Украина, тој рече дека Русија е посветена на мирно решение, а критиките на Курт Волкер ги оцени како неосновани. Лавров го осуди германскиот канцелар Фридрих Мерц за, како што рече, „амбиции за воена доминација во Европа“ и го обвини Вашингтон за еднострани акции во Јужна Америка.

Тој потврди дека договорот за соработка со Венецуела е привремено неактивен, а со Кина ќе биде продолжен и зајакнат по истекот во 2026 година.