ПАРИТЕ ВЕЌЕ НЕ СЕ ПРОБЛЕМ – Научниците да творат, државата ќе финансира, најави Јаневска на промоцијата на првиот етимолошки речник

Првиот том на Македонскиот етимолошки речник претставува капитално дело за македонскиот јазик, литературата и науката. Овој проект е доказ дека кога државата инвестира во наука, а научниците со посветеност истражуваат и создаваат нови вредности, резултатите се значајни и трајни.

На промоцијата на речникот, министерката за образование и наука, проф. д-р Весна Јаневска, истакна дека ова е еден од научно-истражувачките проекти финансирани од државниот буџет во 2025 година. Автор на речникот е проф. д-р Гоце Цветановски, научен советник во Институтот за македонски јазик „Крсте Мисирков“ – Скопје.

Јаневска нагласи дека Министерството за образование и наука, со поддршка од Владата, ќе продолжи да ја зголемува поддршката за научни истражувања. Во 2025 година, со 374 милиони денари беа финансирани 40 научно-истражувачки проекти на државните универзитети, факултети, научни институти и МАНУ. Во наредниот период, вложувањата во науката ќе бидат уште поголеми.

Минатата година буџетот за наука се речиси двојно зголеми во однос на 2024 година и изнесуваше 680 милиони денари, а за 2026 година се обезбедени 773 милиони денари.

„Македонија мора да се сврти кон науката ако сака да направи исчекор во сите сфери. Пресилно долго сме заробени во навики и модели кои не водат кон напредок. Светот и регионот се движат со брзи чекори, а ние не смееме само да гледаме“, изјави министерката Јаневска.

Таа додаде дека финансирањето на издржани научни проекти веќе нема да биде проблем. Со новите закони за високо образование, за научно-истражувачка дејност и за квалитет во високото образование, ќе се создаде стабилна основа за развој на науката. Единствено што е потребно е научниците и професорите да сакаат да творат.