ОД САНТА МОНИКА ДО ХОЛИВУДСКА ЛЕГЕНДА – Почина Роберт Редфорд на 89 години

Актерот и режисер Роберт Редфорд почина на 16 септември, на 89-годишна возраст, во својот дом во Санденс, Јута, „на местото што го сакаше, опкружен со луѓето што ги сакаше“, соопшти неговата агенција. Семејството побара приватност, додавајќи дека „ќе ни недостига многу“.

Редфорд стана холивудска ѕвезда благодарение на улогите во филмови како „Буч Касиди и Санденс Кид“, „Бодеж“, „Моја Африка“ и „Шепотот на коњите“. И покрај славата, тој остана поврзан со природата и својот дом во Јута, каде живееше со својата втора сопруга, германската сликарка Сибил Сагарс.

Беше роден на 18 август 1936 година во Санта Моника, Калифорнија, пораснал во скромно семејство како син на млекар. Прераната смрт на неговата мајка во 1955 година го довела во тежок период, кој го однел кон алкохолот и го загрозил неговото образование, иако претходно добил стипендија за колеџ преку бејзбол.

Пред да стане холивудска ѕвезда, Редфорд работел на нафтени полиња во Калифорнија, а потоа патувал во Европа каде се интересирал за уметност, дури и кратко работел како уличен сликар во Фиренца.