МАКЕДОНСКИОТ ЈАЗИК – Богатство и идентитет на Македонците во Албанија

Во пресрет на 21 февруари, Меѓународниот ден на мајчиниот јазик, Македонската алијанса за европска интеграција (МАЕИ), единствената партија на Македонците во Албанија, истакнува дека „македонскиот јазик е богатство на културата и идентитетот на македонската заедница во Албанија“, пренесува МИА.

Честитајќи го денот, партијата посочува дека преземањето активности за заштита на мајчините јазици е клучно за обезбедување секоја култура да го зачува својот идентитет и културното богатство.

„За македонската заедница во Албанија е важно да има можност да го изучува, студира и користи својот мајчин јазик без дискриминација. Мајчиниот јазик е многу повеќе од средство за комуникација и тој го претставува идентитетот и културата на еден народ и е богатство кое треба да се чува и заштити“ – се наведува во честитката.

МАЕИ истакнува дека заштитата и употребата на јазикот на македонската заедница во Албанија претставува особено голем предизвик.

„Дискриминацијата и непочитувањето на мајчиниот јазик може да доведе до негово губење. Државата и јавните институции имаат суштинска улога во неговата заштита и унапредување. Ова може да вклучува употреба на јазикот во официјални документи, сите нивоа на образованието, локални и национални медиуми, како и финансиска поддршка за иницијативите и организациите кои работат на зачувување и промоција на македонскиот јазик“ – се нагласува понатаму.

Партијата додава дека и поединците можат да направат разлика преку ценење и користење на својот мајчин јазик.

Во Албанија живеат над 100.000 Македонци, а македонскиот јазик се зборува во региони како Преспа (каде што постои настава на македонски), Голо Брдо (настава на македонски во периодот 1945-1948), Гора, селото Врбник, областа Девол (каде што настава на македонски се одржувала до 2014 година), како и во градовите Тирана, Драч, Елбасан, Подградец, Корча, Билишта и други.